I Testi delle Canzoni Milanesi d’Autore

 

 

Mimmo Dimiccoli

 

 

 

 

* El Barbon di Navili

* Milan se canta inscì

* Conoss Milan

* Città de salvà

* Demes ‘na man

* El coeur d’on meneghin

* El garagista

* La crociera di milanes

* La maschera

* Scoltom Madonina

 

 

 

 

 

 

Testi

 

 

 

El Barbon di Navili

Premio D'ANZI 1975/76

 

Una nòtt per amor disperaa

su la ripa de Porta Cines

cont la nebbia l'era el pòst ideal

per ‘mazzamm e levamm on grand pes

scarsa la lus on silenzi mortal

me porti giò a dò pass dal canal

sari sù j oeucc me fò el segn de la cros

ma dal navili ven sù 'na vos

 

Uehi vigliach, guardom mì

hinn des ann che sont chì

sòtta i pont

senza on lett ne ona cà

per i dònn g'ho pu nient

vivi de carità

ma l'é mej fa 'l barbon

che crepà

d'ona robba son sicur

te le dis on amis

chi se coppa 'l va nò

in paradis

damm a traa va a dormì

te seet giovin per morì

fa nò’l stupid

e ricòrdes de mi

 

Senza manca rispond scappi via

cont on frecc in di òss stavi mal

ma el ciarin d'ona veggia osteria

de lontan el pareva ciamamm

me infili denter ancamò agità

bevi on grappin e ricominci a fiadà

l'ambient l'era pien a gh'era gent d'ogni età

vun che sonava e tucc a cantà

 

Mi so nò chi lé staa

ma me sont trova là

dòpo un poo

insemma a lor a brindà

l'é staa insci che ho capì

quell ch'el vecc: el m'ha dit:

“In la vita

se dev anca soffrì”

questa amara realtà

la m'ha faa medità

dal barbon di navili

son tornaa

g'ho portaa de mangià

dopo avel ringraziaa

e commoss

a l'ho basaa.

Torna all’inizio

 

 

 

 

 

Milan se canta inscì

 

Per mi gh'é nient de mej che 'nda a la sera

in ona piola e cont chitarra in man

cantà in meneghin e faa in manera de fam

capì quand parli de Milan

che bell scoltà 'o mia bella Madonnina'

se an coro improvvisaa el me rispond

la nostra l'é 'na madonna pellegrina

che num portom in ger per tutt el mond.

 

Milan v'el disi mì

per minga fagh dispett

se dev cantala inscì

col so dialett

e a chi ries no a capì

regali la melodia

cont mi se passa on'ora

in allegria.

 

Me pias de tant in tant tornà all'antiga

e fagh i serenaad ai bei tosan

sonà e cantà per mi l'é no fadiga

e sont mai stuff se parli de Milan

se poeu la not l'é tevida e seréna

e a 'na finestra spunta on bell faccin

se nascond anca la luna piéna

per invidala giò a dam on basin.

 

Milan v'el disi mì

per minga fagh dispett

se dev cantala inscì

col so dialett

e a chi ries no a capì

regali la melodia

cont mi se passa on'ora

in allegria.

Torna all’inizio

 

 

 

 

 

Conoss Milan

 

Vorevi a tutti i costi faa fortuna

e per on pò de temp sont emigraa

mi che credevi de troa la luna

me sont accort cvhe stavi mej a caa

adess se gh'é on quei vun

ch’el voraria partì

riessi no tasé

e gh'e disi insci

 

Fa no la stupidada de 'nda via

da ona città bela come Milan

mi ho mai soffert insci in vitta mia

i forestee te tratten de villan

ma quand me capitava vun de lor

ch'el se vantava lu el sò paes

gh'e rispondevi naan prima de cicciarà,

veen a conos Milan e i milanes

 

Dopó tri di te veen la nostalgia

te penset a tutt quell che te lassà

ai bei serat passà in compagnia

cont j amis a bev e a cantà

te maledisset tutt

te odiett i danee

te podet no fa a men

de tornà indree

 

Fa no la stupidada de 'nda via

da ona città bela come Milan

mi ho mai soffert ínsci in vitta mia

i forestee te tratten de villan

ma quand me capitava vun de lor

ch'el se vantava lu el sò paes

gh'e rispondevi naan prima de cacciarà

ven a conos Milan e i milanes.

Torna all’inizio

 

 

 

 

Città de salvà 

 

Sfojand i pagin de i liber de stòria

se legg dove se parla de Milan

de quanta gent la s’è copert de gloria

per cascià via l'invasor lontan

per cinch giornad i nòster antenaa

hann combattu e salvaa stoo bel paes

e l'é staa car el prezzi che hann pagaa

per dagh la libertà ai milanes

 

Milan... Milan

ispirazion de musica e poesia

un quader grandios

pitturaa in mezz a la Lombardia

città creada

per viv d'amor e de serenità

ma el tò destin l'é quell de tribolà

anmò ‘na volta te set de salvà.

 

Semm passaa sora a tanti ann de guerra

per l'operosità di meneghin Milan

l'é diventada pusse bella

ma se poeu nò staa in pas un cicinin

se gh'ha paura quand ven giò la sera

girà cont in sacòccia quatter ghej

l'é pegg che vess a la legion straniera

adess se femm la forca traa fradej.

 

Milan... Milan

ispirazion de musica e poesia

un quader grandios

pitturaa in mezz a la Lombardia

città creada

per viv d'amor e de serenità

ma el tò destin l'é quell de tribolà

anmò ‘na volta te set de salvà.

Torna all’inizio

 

 

 

 

 

 

Demes 'na man

 

L'é on poo che va 'dree a pioeuv sul bagnaa

gh'é chi brontola che stemm pegg de prima

tanta gent ghe manca 'l lavorà

se lamenta chi tira la lima

per superà la crisi el malandaa

bisognaria aiutas almen tra numm

perché se gh'é uguaglianza e civiltà

se poeu tira '1 carel on pò per on

 

Demes 'na man

come se faa tra amis

tiremm su insemma el mur

che gh'é crollà

‘na préia per on inscì

come se dis

e on cicin de bòna

volontà

ghe voeur per fa tornà

ancamò el seren

senza pù invidia

e senza ipocrisia

mi sont sicur che se

se voeurom ben

i dispiasé se fann

scarligà via

 

Me fa paura quand senti parlaa

chi dis che per salvà la situazion

saria ora ormai de das de faa

perché femm minga ‘na rivoluzion

ma per chi l'ha giamò subì ‘na guerra

e l'é on discors ch'el faa vegnì el magon

l'é mej staa mal ma staa coi pee per terra

chi voeur crepà per mi l'é un grand cojon

 

Demes 'na man

come se faa tra amis

tiremm su insemma el mur

che gh'é crollà

‘na préia per on inscì

come se dis

e on cicin de bòna

volontà

ghe voeur per fa tornà

ancamò el seren

senza pù invidia

e senza ipocrisia

mi sont sicur che se

se voeurom ben

i dispiasé se fann

scarligà via

Torna all’inizio

 

 

 

 

 

 

El coeur d'on meneghin

 

Da quand la mia città la s’è sgrandida

tra i tanti forestee che gh'é arrivà

gh'é on quejvun che l’ha nò capida

che a faa el villan gh'é nient de guadagnà

perché ves permalos, perché ves diffident

se tucc fann come mì nissun se offend

 

Mi sont nassuu a Milan

e sont semper cortes

anche cont chi l'é minga milanes

me pias la compagnia

se gh'é un poo d'allegria

me divertissi inscì senza pretes

se poeu gh’é ‘na chitarra

e poeudi cantà

allora s'cioppi de felicità

basta ‘na canzonetta

e on bon biccer de vin

per faa content el coeur d'on meneghin.

 

Sarà perché numm semm gent a la bòna

e lassom perd tanti stupidad

gh'emm la madonina che perdòna

chi ciappa gust a famm i carognad

e se gh'é on gibilee cercom de ragionà

poeu 'ndem a bev per minga litigà

 

Mi sont nassuu a Milan

e sont semper cortes

anche cont chi l'é minga milanes

me pias la compagnia

se gh'é un poo d'allegria

me divertissi inscì senza pretes

se poeu gh’é ‘na chitarra

e poeudi cantà

allora s'cioppi de felicità

basta ‘na canzonetta

e on bon biccer de vin

per faa content el coeur d'on meneghin.

Torna all’inizio

 

 

 

 

 

 

El Garagista

 

A l'é vint’ann che foo el garagista

in on quartier del centro città

nel mè mestee coi dònn sont on artista

gentil alegher semper educaa

tra i mè client gh'era ona biondina

che per la grana l'aveva sposaa

on vecc industrial brutt e cattiv

pien de pretes, però l'ha mai sganciaa

 

Per lee fasevi ‘na grand malattia

ma col passà del temp la ma smontaa

la sua Mercedes l'era ‘na mania

dovevi quasi semper controllà

mai ona volta che la ringraziava

l'andava via senza saludà

mi s’eri lì domà a curà el momento

de fà on quejcos per faghela pagà

 

Combinazion ho faa el turno de nòtt

me riposavi sora ‘na brandina

saran staa i dò or, senti sonà

a l'era el macchinon cont la biondina

appena denter la me squadra ben

peou la me dis « oh bella ‘l gh'é chì lù ! »

la derva la portera e pian pianin

la slonga i man e la me tira sù

 

Me sont trovaa a contatt col sò respir

lee ne podeva pù de fas basà

la se strusciava e me ciamava amor

mi hoo faa finta de nient e sont andaa

g'hoo faa capì che mi sont nò on giocattol

che serv a divertiss per trii minutt

lee l'é restada mal ma mì cojon

per dignità ho pers on occasion.

Torna all’inizio

 

 

 

 

 

La crociera di milanes

 

Se te voeuret passà ‘na giornada

bella e piena de felicità

salta sù sul barcon che in crociera

da Cugionn el te porta in città

l'è on spettacol meraviglios

tra campagna e casett diroccaa

te va via tutt el nervos

te ven voeuja domà de cantà

 

Ma che bell navigà sul navili

fas cunà in su l'acqua pian pian

traa el profumm de la terra lombarda

in mezz al verd che circonda Milan

ona musica allegra e’l barbera

t'accompagna fin a Porta Cines

dove finiss quand ormai l'é già sera

la crociera di milanes

 

Per la grand occasion la mattina

se vestiss tutt a festa el barcon

par de ves su ‘na riva marina

cont cadregh tavolin e ombrellon

gh'é chi ciappa dò ciocch de filada

chi continua a mangià tutt el dì

quell che vosa a ‘na tosa per strada

bella gioia ven chi insemma a mì

 

Ma che bell navigà sul navili

fas cunà in su l'acqua pian pian

traa el profumm de la terra lombarda

in mezz al verd che circonda Milan

ona musica allegra e’l barbera

t'accompagna fin a Porta Cines

dove finiss quand ormai l'é già sera

la crociera di milanes

Torna all’inizio

 

 

 

 

 

La maschera

 

A on ball in maschera

de on grand veglion

danza ‘na còppia

in mezz al salon

i alter in gir

fan de cornis

picchen i man

voeuren el bis

la scena l'é pròpi bella

on numer de quej de class

i moviment perfett

lor sbaglien nanca on pass

ma poeu ad on tratt

lù el se lassa andà

el borla in terra

senza fiadà.

 

Stee minga lì a guardà

tirell in pee

su nò nanca chi l'é

la vosa lee

tirémegh giò la maschera

per carità

ma par ch'el fa fadiga

a respirà.

 

Sòtta la maschera

‘na faccia stracca

un poo increspada

la testa bianca

da ver artista

el nascondeva

cont perucca e carton

 i ann ch'el gaveva

poeu s’è faa avanti on scior

el dis sont on dottor

stee indree el conossi mì

peccaa l'é adree a morì

a l'era quest

el so destin

l'é staa in teater

o grand ballerin.

 

Per lù in la vita gh'era

domà el ballaa

ma ormai a l'era vécc

col coeur malaa

el se truccava in di

serat de gala

a ghe pareva

de tornà a la Scala.

Torna all’inizio

 

 

 

 

 

Scoltom Madonina

 

Che bel girà per la deserta via

per vun sentimental come sont mi

la luna che me fa de compagnia

par che la dis sta chì va nò a dormi

 

Stasera, gh'hoo voeuja

de parlà del me Milan

e guardi su in ciel

perché a g'hoo bisògn ‘na man

scoltom madonnina

t'el seet che me rivòlgi a ti

fa come prima

tornà la pas che gh'era un dì

 

questa città ormai la fa paura

succed di ròbb che fann rabbrividì

la vita al dì d'incoeu l'é giamò dura

convinces se poeu nò ‘ndà avanti inscì

 

perdonom madonina

se me sfoghi un poo cont tì

g'hoo’l coeur che lacrima

te preghi anmò stamm a sentì

Milan l'é pu quell

ch'el Porta decantava on temp

sòtta ai tò oeucc

adess a ghé tutt'altra gent

 

l'é dusent'ann che t'han miss in sul Dòmm

te seet el simbol de num milanes

te voerum tanto ben ma tì però

soddisfa on cicinin i nòst pretes

 

la luna se oscura

l'é ‘dree a piang insemma a mì

la guardi, sospiri

forse le la m’ha capii.

Torna all’inizio

 

 

 

 

 

La Canzon

Milanesa